Мізгіры. Царква Пятра і Паўла

У мястэчку Мізгіры Слонімскага раёна пабудавана мураваная праваслаўная царква Святых Пятра і Паўла.

 Храм узведзены на мясцовых могілках крыху ў бок ад самога паселішча. Царкву пабудавалі ў часы Расійскай імперыі ў 1886 годзе. Раней тут быў стары драўляны храм. У савецкія часы царкву зачынілі. Перадалі святыню праваслаўным вернікам у апошнія гады існавання Савецкага Саюза. У 1988 годзе пачаўся рамонт будынка. У 1990 годзе храм зноў пачаў працаваць.

 Помнік узведзены ў рэтраспектыўна – рускім стылі.

 Будынак складаецца з чатырох асноўных кананічных частак паводле падоўжанай восі: прытвор, трапезная, малітоўная зала і апсіда. Галоўны ўваход аформлены ў выглядзе мураванага ганка пад двухсхільным дахам на двух мураваных слупах, як у старажытнарускіх храмах. Над прытворам надбудавана двухярусная вежа – званіца. Вежа завершана васьміграным барабанам і невялікім купалам – цыбулінай. Трапезная накрыта двухскатным дахам. Над асноўным аб'ёмам знаходзіцца васьмігранны барабан і купал – цыбуліна. Да асноўнага аб'ёму прыбудавана прамавугольная апсіда. У царкве ў бакавых сценах і ў званіцы маюцца паўцыркулярныя аконныя праёмы.

Перад царквой пабудавана мураваная трохпралётная мураваная брама. Вакол храма ўзведзена мураваная агароджа з бутавага камяня.