Малыя Жухавічы. Царква Раства Іаана Прадцечы

У мястэчку Малыя Жухавічы Карэліцкага раёна ёсць драўляная царква Раства Іаана Прадцечы. Храм узведзены ў часы Вялікага княства Літоўскага ў 1782 годзе. У часы Расійскай імперыі ў 1882 годзе пры храме адчынена царкоўнапрыхадская школа. Будынак некалькі разоў рамантаваўся і перабудоўваўся. 

У царкве доўгі час знаходзілася Евангелле 15 стагоддзя, якое назвалі Малажухавіцкае. Евангелле створана напрыканцы 15 – пачатку 16 стагоддзя і захоўвалася ў царкве мястэчка Малыя Жухавічы, пра што паведамляецца запіс на адной са старонак. Кніга была на захаванні ў Віленскім беларускім музеі з пачатку 1920 – х гадоў і да 1946 года. Затым евангелле апынулася ў бібліятэцы Акадэміі навук Літвы.

 У рукапісе налічваецца 347 старонак, якія напісаныя мастацкім паўуставам цёмна – карычневай і чырвонай фарбамі на царкоўнаславянскай мове з асаблівасцямі беларускай мовы. Кніга ўпрыгожана ініцыяламі, застаўкамі, фігурнымі мініяцюрамі з выявамі евангелістаў. Зусім нядаўна ў 2023 годзе было зроблена факсімільнае выданне з тыражом 99 асобнікаў кнігі.

Святыня пабудавана на сродкі мясцовага памешчыка Несіяслаўскага. У 1876 годзе праведзены рамонт падмурка. 

Пасля Вялікай Айчыннай вайны ў савецкія часы храм зачынілі.

Напрыканцы існавання СССР у 1989 годзе царкву вярнулі праваслаўным вернікам. Храм адрамантавалі. Царква дзейнічае.