Вялікія Жухавічы. Царква Пятра і Паўла

У мястэчку Вялікія Жухавічы Карэліцкага раёна знаходзіцца драўляная праваслаўная царква, якую асвяцілі ў гонар Пятра і Паўла. Храм пабудаваны, як уніяцкая царква ў эпоху Вялікага Княства Літоўскага ў 1745 годзе. Святыня пабудавана за сродкі магната князя Караля Радзівіла.

 Царква была прыпісана да царквы ў мястэчку Турэц, якое знаходзіцца па шляху з Карэлечаў на Мір. У часы Расійскай імперыі ў 1890 годзе пры храме была пабудавана драўляная царкоўна-прыхадская школа.

 Храм складаецца з трох асноўных архітэктурных частак: прытвор, малітоўная зала і апсіда. Квадратны прытвор прыбудаваны да прамавугольнага зруба, дзе знаходзіцца малітоўная зала. Да асноўнага аб'ёма прыбудавана пяцігранная апсіда.

У інтэр'еры храма трохярусны іканастас з 11 абразамі. Маюцца старажытныя абразы 18 – 19 стагоддзяў: «Георгій Пераможца», «Маці Божая з дзіцём», «Апосталы Фама і Іаан», «Святая Кацярына».

У 19 стагоддзі каля царквы была пабудавана мураваная двухярусная вежа – званіца, якая накрыта шатровым дахам. На званіцы было чатыры званы. Над дахам на барабане знаходзіцца купал–цыбуліна. Званіца пабудавана з бутавага камяня з выкарыстаннем ізюмнай кладкі.

Царква ў апошнія гады адрамантаваная.