Ляхаўцы. Царква Святога Мікалая

Мястэчка Ляхаўцы Маларыцкага раёна знаходзіцца ў глушы беларускага Палесся сярод лясоў і балот. Каб сюды дабрацца прасцей будзе праехаць да раёнага цэнтра Маларыта, а потым паехаць на ўсход у бок мястэчка Макраны.

У Ляхаўцах да нашага часу захавалася два драўляныя праваслаўныя храмы: царква Нараджэння Маці Божай і капліца на мясцовых могілках у гонар Святога Мікалая.

У некаторых гістарычных крыніцах храм Святога Мікалая называюць капліцай, а ў некаторых царквой. Капліца пабудавана ў часы Расійскай імперыі ў 1835 годзе. Будынак драўляны, узведзены ў традыцыях народнага дойлідства. Гэта чатырохсценны зруб, які накрыты вальмавым дахам. Складаецца будынак з прытвора і малітоўнай залы. У інтэр'еры ёсць іканастас 19 стагоддзя з старажытнымі абразамі 17 – 18 стагоддзяў: «Георгій Пераможца», «Маленне Іакіма і Анны», «Тайняя вячэра», «Зняцце з крыжа» і іншыя.

 Менавіта з гэтага храма паходзіць вядомы абраз «Нараджэння Маці Божай» 17 стагоддзя, які зараз знаходзіцца ў Мінску ў Нацыянальным мастацкім музеі Рэспублікі Беларусь. Гэты каштоўны абраз быў знойдзены і даследваны экспедыцыяй Дзяржаўнага мастацкага музея БССР. Абраз быў адноўлены і рэстаўраваны ў інстытуце «Рэстаўрацыя» майстрамі  А. Красліным і С. Філатавым у 1979 годзе. На выяве, напрыклад, служанкі намаляваны ў строях беларускіх сялянак, што з'яўляецца каштоўным помнікам іканаграфіі і этнаграфіі.