Дарапеевічы. Царква Нараджэння Маці Божай

Усяго ў 10 кіламетрах ад Украіны знаходзяцца Дарапеевічы, якія заснаваныя на беразе старэйшага меліярацыйнага канала на Беларусі – канала Боны Сфорцы 16 стагоддзя.

Мястэчка Дарапеевічы мае цікавую легенду аб паходжанні назвы гэтага паселішча. Калісці ў даўнія часы жылі тут два браты якіх звалі Дарафей і Дакім. Дарафей меў шмат дзяцей, якіх звалі ўсе Дарафеевічы. Ад гэтага і пайшла назва самога мястэчка. Першапачаткова назва была «Дарафеевічы». Часам у некаторых крыніцах назва мястэчка гучыць, як Вялікія Дарапеевічы, бо побач знаходзяцца Малыя Дарапеевічы.

У мястэчку Дарапеевічы знаходзіцца адзін з самых старых храмаў у рэгіёне. Праваслаўная царква Нараджэння Маці Божай была пабудавана яшчэ ў часы Вялікага Княства Літоўскага ў 1671 годзе. Асноўны аб'ём кампазіцыі храма мае прамавугольны ў плане будынак, які накрыты двухярусным дахам. Да асноўнага аб'ёму з боку галоўнага ўвахода прыбудаваны прытвор з вежай – званіцай. Званіца двухярусная чацвярык у плане, які завершаны чатырохгранным шпілем з невялікай цыбулінай.

 У інтэр'еры  над уваходам маюца хоры. Быў таксама раней разны алтар. У 1902 годзе з усходняй часткі царквы прыбудавана апсіда з сакрысціямі. Зараз царква мае трохзрубную падоўжана – восевую кампазіцыю. Будынак узведзены на невысокім падмурку з бутавага камяня.

Царква была зачынена ў савецкія часы ў 1964 годзе. І нават была спроба савецкіх актывістаў разабраць і знішчыць царкву, але мясцовыя жыхары не дазволілі зруйнаваць святыню. У 1989 годзе храм вярнулі вернікам. Быў праведзены рамонт. Царква дзейнічае.