Магілёў. Дом Бабовіка.

Дом Бабовіка. Калі будзеце шпацыраваць па пешаходнай вуліцы горада Магілёва – Ленінскай, былой Ветранай і Вялікай Садовай, то абавязкова звярніце ўвагу на трохпавярховы асабняк, фасад якога зроблены з жоўтай цэглы. Гэта даходны дом Бабовіка, пабудаваны напрыканцы 19 стагоддзя магілёўскім мільянерам Мойшам Бабовікам. Будынак пабудаваны ў стылі эклектыкі, у якім прасочваецца некалькі архітэктурных напрамкаў. Уверсе над балконамі вы можаце пабачыць некалькі дат : 1898 і 1954 год. У 1898 годзе гэты дом быў пабудаваны. А ў 1954 - адрэстаўраваны пасля пажару, што адбыўся ў час вайны.

Будынак здаваўся ў арэнду - тут былі розныя ўстановы на любы густ: музычная крама, зубаўрачэбны кабінет, крама па продажы садавіны і гародніны і іншае. Пасля Бабовіка было яшчэ некалькі ўладальнікаў гэтага прыгожага дома. Пасля рэвалюцыі тут быў буйны адміністрацыйны будынак – Акруговы камітэт Магілёўскай акругі. А з 1930 года - педінстытут. У розныя часы тут працавалі выбітныя навукоўцы: паэт і перакладчык Юрка Гаўрук, краязнавец і географ Даніла Васілеўскі, географ і педагог Пётр Лярскі і многія іншыя. Зараз у будынку знаходзіцца адзін з карпусоў універсітэта імя Аркадзя Куляшова з двума факультэтамі.