Магілёў. Палац Станіслава Богуш – Сестранцэвіча

Пасля першага падзелу Рэчы Паспалітай у 1772 годзе Магілёў увайшоў у склад Расійскай імперыі і па загаду імператрыцы Кацярыны ІІ было ўтворана арцыбіскупства, дзе галоўным горадам каталікоў становіцца горад Магілёў. На чале арцыбіскупства прызначаецца Станіслаў Богуш – Сестранцэвіч, для якога ў Магілёве будуецца 2 палацы. Адзін у цэнтры горада на вуліцы Дваранскай, сёняшняй Камсамольскай, а другі за горадам у прадмесці Пячэрск. С. Богуш – Сестранцэвіч (1731 – 1826) – беларускі і расійскі грамадскі і рэлігійны дзеяч, літаратар і гісторык. 

Палац пабудавалі напрыканцы 18 стагоддзя ў цэнтры Магілёва, які галоўным фасадам выходзіў на вуліцу Дваранскую. Пабудаваны ў стылі класіцызму з элементамі барока. Будынак мураваны, двухпавярховы і чатырохкутны ў плане з 2 бакавымі крыламі. Пасля пажару ў другой палове 19 стагоддзя ад палацу засталіся толькі сцены. Гэтыя руіны набыў яўрэйскі купец Борух Цукерман, які ўзбагаціўся на пастаўках правіянту расійскай арміі ў час вайны. Цукерман перабудаваў былы палац пад харальную сінагогу, якая ў савецкія часы была зачынена і аддадзена пад сацыяльныя ўстановы. Зараз у будынку знаходзіцца дзіцячая спартовая школа. Сярод выпускникоў школы ёсць выбітныя спартсмены і нават алімпійскія чэмпіёны. Напрыклад, Святлана Баітава, магілёўская гімнастка, пераможца на алімпійскіх гульнях у 1988 годзе.