Дзеткавічы. Царква Пакрава Прасвятой Багародзіцы

У Драгічынскім раёне ў мястэчку Дзеткавічы знаходзіцца драўляная праваслаўная царква Пакрава Прасвятой Багародзіцы.

 Пабудаваны храм і заснаваны пры ім прыход быў земскім пісарам Брэсцкага ваяводства памешчыкам Паўлам Бухавецкім, які фундаваў будаўніцтва царквы ў 1738 годзе. Будаўніцтва было завершана к 1740 году і , акрамя таго, Бухавецкі царкве перадаў таксама зямлю. Царква будавалася, як уніяцкі храм.

У часы Расійскай імперыі святыню перабудавалі і перадалі праваслаўным вернікам у 1840 – х гадах. У 1884 годзе святаром у Пакроўскай царкве быў прызначаны Канстанцін Жуковіч, які захацеў адразу адрамантаваць будынак. У тым жа 1884 годзе быў зроблены рамонт і перабудова царквы па праекту інжынера А. Ромера. У кастрычніку 1888 года быў храм асвячон у прысутнасці 7 святароў.

Храм зноў быў адрамантаваны ў часы Польскай дзяржавы ў 1920 – я гады.

 Царква пабудавана ў традыцыях драўлянага народнага дойлідства. Складаецца з трох асноўных частак: прытвора, малітоўнай залы і апсіды. Прытвор накрыты двухсхільным дахам і завершаны трохвугольным франтонам. У інтэр'еры ёсць абразы і іканастас 19 стагоддзя, а над уваходам размешчаны хоры. Перад царквой пабудавана двухярусная брама - званіца.