Бронная Гара. Мемарыял.

Паміж Бярозай і Івацэвічамі ёсць чыгуначная станцыя Бронная Гара, побач з якой створаны мемарыял, прысвечаны ахвярам вайны.

Падчас Вялікай Айчыннай вайны ва ўрочышчы каля чыгуначнай станцыі выкопваліся вялікія ямы і расстрэльваліся тысячы ахвяр.

У траўні-верасні 1942 года былі зроблены ямы ў даўжыню 25 - 50 метраў і шырынёй 10 – 12 метраў і на глыбіню 4 метра. Ямы капалі жыхары бліжэйшых вёсак. Тэрыторыя вакол была акружаная плотам і ахоўвалася гітлераўцамі. Вагоны падаваліся ад цэнтральнай чыгуначнай магістралі на спецыяльна пабудаваную каляіну, якая вяла на 300 метраў да ям-магіл.

Людзей распраналі, забіралі каштоўныя рэчы, а потым клалі радамі На дно ямы і расстрэльвалі. Былі таксама расстраляныя і некаторыя мясцовыя жыхары, як сведкі злачынстваў нацыстаў.

Увесну 1944 года, каб схаваць сляды сваіх злачынстваў, нацысты прыгналі ваеннапалонных, якія выкопвалі і спальвалі трупы. Ваеннапалонных таксама потым расстралялі. Усяго па розных ацэнках тут было знішчана прыкладна 50 тысяч чалавек. Пераважна гэта былі габрэі.

У пасляваенны час пачаліся даследаванні злачынстваў нацыстаў. Пошук сведак і дакументаў. На сённяшні дзень устаноўлена два помнікі: памятны знак на месцы расстрэлаў і мемарыял каля чыгуначнай станцыі.