Бастынь. Склеп–пахаванне Феліцыі Дваракоўскай.

На поўнач ад Лунінца па шляху Лунінец–Баранавічы ёсць мястэчка Бастынь, у якім можна пабачыць некалькі гістарычных артэфактаў. Тут узведзена незвычайная драўляная царква, а на мясцовых могілках захаваўся склеп 1833 года – усыпальніца Феліцыі Дваракоўскай з роду Скакоўскіх.

Пасля падзелаў Рэчы Паспалітай і ўваходу беларускіх земляў у склад Расійскай імперыі мясцовай шляхце было неабходна даказаць уладам дакументальна сваё шляхецкае паходжанне. Мясцовы род Скакоўскіх здолеў даказаць свае дваранска – шляхецкія карані. У 1802 годзе род Скакоўскіх Мінскім дваранскім дэпутацкім сабраннем быў пацверджаны ў дваранстве.

Феліцыяна Скакоўская ў 1819 годзе пабралася шлюбам з Іосіфам Дваракоўскім. Герб Дваракоўскіх меў назву «Слепаўрон». 

І. Дваракоўскі нарадзіўся ў 1785 годзе і быў ахрышчаны ў касцёле Давід–Гарадка. А яго бацькамі з'яўляліся вядомыя і паважаныя прадстаўнікі мясцовай шляхты: бацька Ян Ігнацьевіч Дваракоўскі і маці Ангеліна з роду Герловічаў. Іосіф Дваракоўскі ва ўзросце 26 год у 1811 годзе атрымаў чын каморніка Мазырскага ўезда. А ў 1819 ажаніўся на Феліцыяне Скакоўскай, якая была старэйшай за яго на 12 год. Па першаму мужу Феліцыяны прозвішча было Кеневіч.

Феліцыяна памерла ў фальварку Крысцінава ва ўзросце каля 60 год. Пахавалі ў мястэчку Бастынь пры капліцы на мясцовых могілках. У пачатку 2000- х пахаванню Ф. Дваракоўскай надалі статус помніка архітэктуры.