Пінск. Будынак гасцініцы «Англійская».

У горадзе Пінску ў самым пачатку пешаходнай вуліцы Леніна 2, калі будзеце ісці ад будынка езуіцкага калегіўма і Плошчы Леніна, то пабачыце з права ўглавы трохпавярховы будынак у стылі мадэрн – гэта будынак былой гасцініцы «Англійская».

Дом пабудаваны ў 1925 – 1928 гадах з углавым эркерам, які абапіраецца на круглую калону. Гаспадаром будынка быў жыхар горада Пінска Мойша Шмідт. На першым паверсе былі крамы і рэстаран – кабарэ «Парадзіз», дзе была ня толькі выдатная кухня, але і прыгожыя танцоўшчыкі з прафесійнымі музыкантамі. На углавой калоне захаваўся надпіс часоў Польскай дзяржавы, дзе на польскай мове напісана наступнае: «Камісійны магазін Гольдберга». А на другім і трэцім паверсе была лепшая гасцініца горада, якая называлася «Англійская». У кожным нумары быў тэлефон, шыкоўная мэбля і ўсе неабходныя зручнасці. І таму менавіта ў гэтай гасцініцы спыняліся самыя вядомыя госці Пінска.

У 1934 годзе менавіта ў гэтым будынку нейкі час жыла амерыканская географ і вандроўнік Луіза Арнер Бойд (1887 – 1972), якая зрабіла этнаграфічную экспедыцыю па Пінскаму Палессю. Разам з даследчыцай былі польскія географы Ванда Равенская і Станіслаў Гажухоўскі, а таксама асабісты вадзіцель. У гасцініцы даследчыкі жылі два месяцы і адсюль выязджалі ў мястэчкі і вёскі пінскага краю. Луіза Бойд у сваім дзённіку пісала: «За сваё жыццё я бачыла шмат розных кірмашоў у розных краінах свету, але нідзе не бачыла таго ўнікальнага і цікавага, што я ўбачыла ў Пінску…» Экспедыцыя наведала Пінкавічы, Гарадзішча, Кудрычы і іншыя мясціны. У 1937 годзе ў Нью–Ёрку выйшаў фотаальбом «Польская правінцыя», бо ў тыя часы Піншчына ўваходзіла ў склад Польскай дзяржавы да 1939 года.

Падрабязней пра знакамiтую вандроўшчыцу апiсана тут.

Зараз будынак былой гасцініцы адрэстаўраваны і тут знаходзяцца магазіны і жылыя кватэры.