Бялавічы. Пакроўская царква

У Мастоўскім раёне на поўдзень ад раёнага цэнтра знаходзіцца мястэчка Бялавічы. Тут захавалася мураваная праваслаўная царква 19 стагоддзя і парэшткі сядзібы з прыдарожнай капліцай.

Царква Пакрава Прасвятой Багародзіцы была пабудавана на самым заходнім ускрайку мястэчка каля галоўнай дарогі. Храм узведзены ў 1822 годзе на ўзгорку па фундацыі Ганараты Аскеркі. Святыня першапачаткова пабудавана, як уніяцкая царква і была асвечана у гонар Апекі Найсвяцейшай Панны Марыі. Пасля забароны ўніяцтва ў Расійскай імперыі ў 1839 годзе будынак перадалі праваслаўным вернікам. І царкву асвяцілі, як Свята–Пакроўскую. У савецкія часы святыня не зачынялася.

 Будынак мураваны, узведзены з бутавага камяня. Помнік архітэктуры у стылі класіцызму з элементамі барока. Складаецца з двух асноўных архітэктурных частак: малітоўнай залы і паўкруглай апсіды. Храм у плане мае прамавугольнік. Галоўны фасад аздоблены чатырма пілястрамі, антаблементам і фігурным франтонам. Над фасадам узведзены васьмігранны барабан з купалам–цыбулінай.

 Інтэр'ер зальнага тыпу. Маецца двухярусны іканастас. Перад царквой пабудавана двухярусная брама–званіца ў стылі класіцызму.