Бартнікі. Капліца і сядзіба роду Слізняў.

У Баранавіцкім раёне недалёка ад мястэчка Вольна ёсць невялікая вёска Бартнікі, дзе да нашага часу захавалася драўляная сядзіба і капліца роду Слізняў. 

Капліца ўзведзена на пагорку на мясцовых могілках у неагатычным стылі ў 1839 годзе. У плане мае круглую форму. Па перыметры ў сценах зроблены байніцы. На вялікі жаль, капліца зараз знаходзмцца ў аварыйным стане і яе неабходна тэрмінова рамантаваць, бо праваліўся дах і пайшлі шчыліны праз сцены.

 Захаваўся да нашага часу драўляны дом сядзібы роду Слізняў, які ўзведзены ў 19 стагоддзі. Будынак драўляны аднапавярховы.

 У сядзібе нарадзіўся вядомы беларускі жывапісец, мадэльер і скульптар Рафал Ратша Слізень (1804 - 1881). Спачатку вучыўся ў мястэчку Вольна ў базыльянаў у школе. Затым працягнуў адукацыю ў езуіцкай акадэміі ў Полацку. Вучыўся ў Вільні ў вядомых мастакоў Яна Рустэма і Казіміра Ельскага. Затым працаваў у Пецярбургу і вярнуўся ў сядзібу ў Вольна пад Баранавічамі, дзе актыўна займаўся творчасцю. Стварыў мастацкую калекцыю скульптурных партрэтаў сваіх сваякоў і знаёмых. Зрабіў медальёны вядомых пісьменнікаў і дзеячоў: Яна Чачота, Тамаша Зана, Адама Міцкевіча, Канстанціна і Яўстафія Тышкевічаў і многіх іншых.