Голдава. Царква Нараджэння Божай Маці.

 Мястэчка Голдава ўпершыню ўпамінаецца ў пісьмовых крыніцах у 15 стагоддзі. У 17 – 18 стагоддзі ў часы Вялікага княства Літоўскага ўваходзіла ў склад Лідскага павета. У мястэчку была праваслаўная драўляная царква і праходзілі штогадовыя кірмашы.

У 1795 годзе ў цэнтры мястэчка была пабудавана ўніяцкая царква, бо большасць вясковага насельніцтва ў тыя часы на Беларусі былі менавіта ўніятамі. Па меркаванні некаторых даследчыкаў, царкву ўзвялі на месцы занядбанага Троіцкага манастыра базыльянаў. Назва базыльяне паходзіць ад імя Васіля Вялікага, багаслова і царкоўніка, які жыў у 4 стагоддзі нашай эры.

Царква ўзведзена ў стылі беларускага народнага дойлідства. У плане мае прамавугольную канструкцыю. Над прытворам узвышаецца шматярусная чацверыковая вежа, якую завяршае васьмігранны барабан з цыбулінай. На вяршыні цыбуліны знаходзіцца сонцакрыж, зроблены мясцовымі майстрамі. Сонцакрыж – гэта храсціянскія крыжы на Беларусі, якія выраблялі з сонечнымі промнямі. Такія крыжы звычайна ствараліся ў невялікіх мястэчках і вёсках мясцовымі майстрамі кавалямі.

У інтэр'еры царквы ёсць двухярусны іканастас. Перад храмам усталявана двухярусная вежа – званіца. Царква ў апошнія гады адрамантавана.