Заастравечча. Царква Святога пакутніка Дыянісія.

     У Клецкім раёне ў мястэчку Заастравечча знаходзіца праваслаўная драўляная царква Святога пакутніка Дыянісія. У гэтым мястэчку было некалькі культавых будынкаў розных перыядаў і розных стыляў.

        Пасля савецка–польскай вайны і Рыжскагага міру з 1921 года па 1939 год мястэчка было пад уладай Польскай дзяржавы. У гэты перыяд на мясцовых могілках быў пабудаваны вялікі драўляны каталіцкі касцёл. Пасля Вялікай Айчыннай вайны касцёл разабралі. У 1997 годзе на могілках была пабудавана новая мураваная каталіцкая капліца Святой Ганны.

        У часы Польшчы ў 1930-я гады пачалі будаваць мураваны каталіцкі касцёл у цэнтры мястэчка. Але храм не дабудавалі і пасля вайны будынак прыстасавалі пад аўтабазу.

       У цэнтры Заастравечча ёсць старажытны праваслаўны храм. Праваслаўная царква Святога пакутніка Дыянісія была пабудавана ў 19 стагодззі ў часы Расійскай імперыі. Па іншай версіі – храм пабудаваны ў часы Польскай дзяржавы ў 1933 годзе. Магчыма, што храм узведзены ў 19 стагоддзі, а ў 1930–я гады перабудаваны.

       Помнік узведзены ў традыцыях драўлянай народнай архітэктуры. Будынак складаецца з трох асноўных частак: прытвор, малітоўная зала і апсіда. Над прытворам надбудавана шматярусная вежа–званіца: два васьмерыка над двумя чацверыкамі. Інтэр'ер зальнага тыпу. Маецца двухярусны іканастас.