Свяцк. Палац Валовічаў.

Пачаткам будаўніцтва палацава-паркавага комплексу лічыцца 1779 год, калі па ініцыятыве гродзенскага маршалка Юзэфа Валовіча, ідэйнага натхняльніка праекта, яго ўвасабленне ў жыццё пачаў вядомы, таленавіты і вельмі папулярны ў той час італьянскі архітэктар Джузэпэ Сака. Менавіта дзякуючы яго лёгкай руцэ палац і паўстаў перад людзьмі ва ўсім яго харастве, злучыўшы ў сабе найбольш характэрныя рысы адразу трох стыляў: барока, класіцызму, а ва ўнутраным убранні - рамантызму.

Пасля смерці ў 1779 годзе Юзэфа Валовіча справу бацькі па ўзвядзенні палацава-паркавага комплексу працягнуў яго сын Антоній. Да працы былі прыцягнуты лепшыя - вядомыя мастакі Смуглевіч і Манькоўскі, італьянскі жывапісец Тамбары. Цэлая каманда талентаў працавала над стварэннем гэтай жамчужыны для таго, каб яна стала не проста рэзідэнцыяй выхаднога дня, а сапраўдным радавым маёнткам, радавым гняздом старажытнага беларускага шляхецкага роду Валовічаў.

У час Першай сусветнай вайны палац быў пашкоджаны і разрабаваны, у парку загінулі рэдкія пароды дрэў. У 1930 годзе палац стаў уласнасцю дэпартамента аховы здароўя Польшчы, і ў яго сценах размясціўся элітны рэабілітацыйны цэнтр. З 1946-га ў будынку размяшчаўся шпіталь для інвалідаў Вялікай Айчыннай вайны, а з 1971-га па 2005-ы - санаторый для хворых на туберкулёз.

У 2009-м палацава-паркавы комплекс перададзены ААТ "Санаторый "Азёрны". А з 2019-га пачаліся актыўныя работы па рэстаўрацыі палацавага комплексу і аднаўленні паркавай зоны. У наш час, комплекс даступны для наведвання: перш за ўсё, сама тэрыторыя комплексу і прыдварцовая плошча з унікальнай гістарычнай атмасферай часоў Валовічаў. Таксама ў палацава-паркавым комплексе "Вялікі Свяцк Валовічаў" функцыянуе ўтульная камфартабельная гасцініца "Свяцкі Палац" на 22 нумары. Рэканструкцыя працягваецца.