Гродна. Палац Максімовіча.

У горадзе Гродна на пешаходнай частке вуліцы Ажэшка знаходзіца мураваны двухпавярховы палац Максімовіча. Будынак узведзены ў пачатку 19-га стагоддзя ў стылі класіцызму.

Пабудавалі палац для гродзенскага віцэ–губернатара Канстанціна Максімовіча (1768 - 1831) у 1803 годзе. У вайну з французамі у 1812 годзе ў палацы некалькі дзён быў штаб Жэрома Банапарта. Жэром Банапарт (1784 - 1860) - самы малодшы брат Напалеона І Банапарта, кароль Вестфаліі, маршал Францыі.

Затым у будынку размяўчаліся розныя дзяржаўныя ўстановы: губернская ўправа, архіў, дэпартамент дзяржаўнай скарбніцы, канцылярыя падатковай інспекцыі, скарбовая палата і рэстаран.

У гады польска–савецкай вайны летам 1920 года тут нейкі час размяшчаўся рэвалюцыйны камітэт горада Гродна, і на пару дзён тут спыняўся Фелікс Дзяржынскі (1877 - 1926) – расійскі савецкі грамадскі і палітычны дзеяч, заснавальнік ВЧК.

Пасля Рыжскага міру 1921 года Гродна апынулася да 1939 года пад уладай Польскай дзяржавы. У палацы Максімовіча працавала кантора Гродзенскага павятовага стараства, Міністэрства фінансаў, Міністэрства грамадзкіх працаў, мясцовы музей, ашчадная каса Гродзенскага павета і рэдакцыя «Газэты польскай зямлі Гарадзенскай».

У савецкія часы пасля Вялікай айчыннай вайны ў будынку працаваў Выканаўчы камітэт абласнога Савета народных дэпутатаў.

На будынку ўсталяваны мемарыяльныя шыльды П. Сталыпіну і Ф. Дзяржынскаму.