Скідзель. Капліца Узнясення Дзевы Марыі.

На трасе Гродна – Ліда ёсць невялікі гарадок Скідзель, які вядомы з 15 стагоддзя. У даўнія часы мястэчка было славутае сваім маёнткам Чацвярцінскіх з вялікім паркам і радавой капліцай у неагатычным стылі.

Гэты невялікі каталіцкі храм будзе знайсці ня так проста. Ён знаходзіцца на ўскрайку мястэчка сярод старадаўняга парка.

Капліца Узнясення Дзевы Марыі была пабудавана ў 1870 годзе і да 1939 года, да часу далучэння заходняй Беларусі да СССР, з’яўлялася радавым касцёлам паноў Чацвярцінскіх. Пасля вайны касцёл быў зачынены і ў ім размясціліся курсы шафяроў і нейкі час быў вайсковы камісарыят. Пасля развалу Савецкага Саюза каталіцкі храм вярнулі вернікам. Была праведзена рэстаўрацыя. Касцёл адчынены не заўсёды, а, як правіла, у выходныя дні. Таму пры жаданні наведаць храм неабходна загадзя сазваніцца з ксянзом.

Капліца з’яўляецца помнікам архітэктуры неагатычнага стылю. У плане будынак мае чатырохкутны аб’ём, які ўзнесены на высокі цокальны паверх. Па бакам галоўнага фасада пабудаваны дзве шматярусныя круглыя вежы – званіцы. Паміж вежамі трохкутны франтон. Перад галоўным фасадам знаходзіцца тэраса з 13 прыступкамі. Да асноўнага аб’ёму прыбудавана пяцігранная апсіда. Інтэр’ер каталіцкага храма перакрываецца стрэльчатымі крыжовымі скляпеннямі.