Скідзель. Сядзіба Чацвярцінскіх.

Падчас падарожжа ў Скідзель варта наведаць мясцовы парк, па якім было пракладзена 2 водных канала, захаваліся незвычайныя вароты. А ў цэнтры парку ёсць радавая Капліца-пахавальня Чацвярцінскіх.

Вароты ў парку незвычайныя. Гэта 2 каменныя вежы з чырвонай цэглы. Калі вы паглядзіце на герб Скідзеля, то ўбачыце, што гэтыя вежы сталі галоўным элементам герба горада.

Сядзіба Чацвярцінскіх з паркам была пабудавана на беразе невялікай мясцовай рачулкі Скідзелянкі. Да нашага часу панскі палац не захаваўся, бо ён быў знішчаны пажарам у 1920 годзе. Будынак палаца меў П-вобразную форму і быў размешчаны ў цэнтры парку. У сядзібе былі таксама гаспадарчыя пабудовы і млын на беразе ракі, які на жаль, не захаваўся. Пасля пажару ў маёнтку, Чацвярцінскія жылі ў флігелі. На сённяшні дзень з усяго маёнтка захаваўся парк з капліцай і ўязная брама.

Пасля падзелаў Рэчы Паспалітай у другой палове 18–га стагоддзя Скідзель увайшоў у склад Расійскай імперыі, і імператрыца Кацярына II перадала мястэчка ўдаве князя Антонія Святаполк-Чацвярцінскага Калецце. Сам князь А. Чацвярцінскі быў у Рэчы Паспалітай вядомым палітыкам і праславіўся тым, што на шляхецкіх соймах выступаў супраць новай Канстытуцыі Рэчы Паспалітай, якая была прынятая 3 мая 1791 года. І Антонія Чацвярцінскага пакаралі смерцю, як здрадніка Радзімы. Пасля далучэння да Расіі імператрыца ўзяла пад уласную апеку яго сям'ю і падарыла ім Скідзель з 1,5 тысячамі душ прыгонных.

У пачатку 19-га стагоддзя Чацвярцінскія пабудавалі сабе ў Скідзелі маёнтак і парк. Уваходныя вароты-дзве цагляныя вежы, якія адрозніваюцца па вышыні, былі пабудаваны ў канцы 19 стагоддзя ў неагатычным стылі. Парк займае плошчу каля 5 гектараў і створаны ў рэгулярна-пейзажным стылі.