Сямігосцічы. Царква Іаана Багаслова

У Столінскім раёне паміж Давід – Гарадком і Туравам ёсць мястэчка Сямігосцічы. Пасярод мястэчка пабудавана драўляная праваслаўная царква, якую асвяцілі ў гонар Святога Іаана Багаслова.

Царква пабудавана ў часы Расійскай імперыі на пачатку 20 стагоддзя ў 1912 годзе. На гэтым месцы існавала старая царква, якую ўзвялі ў пачатку 19 стагоддзя.

 Асвячэнне святыні адбылося ў кастрычніку 1912 года. Царква працавала ў часы Польскай дзяржавы, у час Вялікай Айчыннай вайны і была зачынена ў савецкія гады у 1961 годзе. І толькі ў апошнія гады існавання Савецкага Саюза храм перадалі праваслаўным вернікам у ліпені 1989 года.

Храм узведзены ў традыцыях народнага драўлянага дойлідства. Складаецца будынак з чатырох асноўных частак: прытвор, трапезная, або бабінец, малітоўная зала і апсіда. Над прытворам надбудавана трохярусная вежа – званіца, якая накрыта чатырохсхільным дахам. Уваход аформлены ў выглядзе казырка з ганкам. Трапезная накрыта двухсхільным дахам. Асноўны аб'ём накрыты чатырохсхільным дахам, які завершаны васьмігранным барабанам з шатром – цыбулінай. Пяцігранная апсіда завяршае кампазіцыю храма. У інтэр'еры маецца троярусны іканастас.