Альгомель. Царква Уваскрашэння Хрыстова

У мястэчку Альгомель Столінскага раёна пабудавана драўляная праваслаўная царква Уваскрашэння Хрыстова. Храм узведзены ў 1817 годзе за сродкі мясцовага памешчыка Рамана Фарэйстэра. Святыня пабудавана па традыцыі Палескага драўлянага народнага дойлідства і складаецца з трох асноўных частак: прытвор, малітоўная зала і апсіда.

Асноўны аб'ём малітоўнай залы зроблены з чатырохсценнага зруба. З захадняй часткі малітоўнай залы прыбудаваны прытвор, над якім надбудавана вежа – званіца. Над званіцай чатырохскатны дах з невялікім гранёным барабанам і цыбулінай. Асноўны аб'ём накрыты двухскатным дахам і завершаны васьміграным барабанам з цыбулінай.

У інтэр'еры ёсць трохярусны разны драўляны іканастас 18 стагоддзя, які, мабыць, застаўся ад старой царквы эпохі Вялікага Княства Літоўскага.

У іканастасе захавалася дванаццаць абразоў так званага апольстальскага чыну. Дэісуснага чыну абраз «Спас з прадстаячымі», «Дабравест» 1759 года, «Маці Божая Адзігітрыя» і іншыя. Таксама ёсць абразы больш старажытныя, якія мабыць належылі да ўніяцкай царквы: «Сашэсце ў пекла» 17 стагоддзя, «Васіль Вялікі», «Маці Божая Адзігітрыя», «Троіца старазапаветная» і «Дэісус» 18 стагоддзя. Царква зараз рэдка выкарыстоўваецца, бо яна ўжо старая і прыпісаны храм да сучаснай мураванай царквы Марыі Магдаліны.