Самуйлавічы Дольныя. Царква Святога Мікалая

У мястэчку з прыгожай назвай Самуйлавічы Дольныя Мастоўскага раёна ёсць мураваная праваслаўная царква Святога Мікалая.

 Храм узведзены ў часы Расійскай імперыі ў 1801 годзе з цэглы і бутавага камяня. Пабудаваны храм за сродкі Ігнація Аскерка. З 1864 года тут маюцца з дапамогай графа Мікалая Мураў'ёва сярэбраныя і пазалочаныя царкоўныя прылады: пацір, напрастольны крыж і іншыя рэчы. Прыхаджан мелася 1361 чалавек мужскога пола і 1281 жаночага. Да царквы было прыпісана 19 вёсак і мястэчак. Мелася таксама 1 царква прыпісная, пяць царкоўна – прыхадскіх школ і царкоўна – прыхадское папячыцельства. Пры царкве служыла два святары: псаломшчык і настаяцель храма. Царква мела зямлі 37 дзесяцін.

 Званіца пабудавана ў 1875 годзе. У 1876 годзе будынак перабудаваны  па праекту інжынера і архітэктара  Леанарда Кржыжаноўскага за сродкі прыхаджан.  Пасля Вялікай Айчыннай вайны ў савецкія часы храм зачынілі. Перадалі святыню праваслаўным вернікам у апошнія гады існавання СССР у 1988 годзе. Быў распачаты рамонт.

 Помнік узведзены ў стылі класіцызму. Будынак мае прамавугольны ў плане аб'ём, які завершаны паўкруглай апсідай. Пасярэдзіне храма на даху знаходзіцца васьмігранны барабан з купалам – цыбулінай.