Ружаны. Касцёл Святога Казіміра

 У мястэчку Ружаны ў Пружанскім раёне можна шмат чаго пабачыць з гістарычных помнікаў і музееў. Гарадок невялікі і можа вам спатрэбіцца цэлы дзень, каб усё наведаць. Вам абавязкова пакажуць палац–рэзідэнцыю магнатаў Сапегаў і былую гандлёвую плошчу, дзе захавалася некалькі ўнікальных культавых будынкаў: царква, касцёл і сінагога.

 І ў вас зусім можа не застацца часу на яшчэ адзін помнік 18 стагоддзя, які знаходзіцца на самым ускрайку мястэчка на мясцовых могілках - гэта касцёл Святога Казіміра. Ён добра бачны ад палаца Сапегаў, калі будзеце аглядаць панараму горада з узвышша.

Касцёл быў пабудаваны ў 1792 годзе па праекту вядомага архітэктара з саксоніі Яна Самуэля Бекера, які лічыўся прыдворным архітэктарам у Сапег. Касцёл пабудаваны за сродкі гаспадара маёнтка ў Ружанах Аляксандра Міхала Сапегі (1730 - 1793) – палітычны і ваенны дзеяч Вялікага Княства Літоўскага, гетман польскi i літоўскі, ваявода Полацкі, канцлер Вялкага Княства Літоўскага.

Каталіцкую святыню назвалі ў гонар Святога Казіміра, мошчы якога нейкі час захоўваліся ва ўладаннях Сапегаў.

Помнік узведзены ў стылі класіцызму. Будынак мураваны, у плане мае прамавугольнік. Накрыты двухскатным дахам. Галоўны фасад аздоблены чатырма калонамі дарыйскага ордэра. У інтэр'еры ёсць алтар мураваны, які выкананы таксама ў дарыйскім ордэры.

У апошнія гады касцёл Казіміра быў адрэстаўраваны. Святы Казімір лічыцца апекуном Ружанаў і яго выява ёсць на гербе горада.