Блізная. Царква Аляксандра Неўскага

Як ехаць з Ружанаў на Слонім праз Ружанскую пушчу ў Пружанскім раёне, то злева ад трасы будзе вёска Блізная. Тут захавалася каменная праваслаўная царква і рэшткі панскай сядзібы. Мястэчка ўпершыню згадваецца ў гістарычных крыніцах у 16 стагоддзі ў часы Вялікага Княства Літоўскага.

Царква Аляксандра Неўскага была пабудавана ў часы Расійскай імперыі ў 1885-1888 годзе на мясцовых могілках. Храм быў прыпісаны да царквы Пятра і Паўла ў Ружанах. Пасля Вялікай Айчыннай вайны ў 1960-я гады святыню зачынілі і будынак пачаў прыходзіць у заняпад.

Так працягвалася, пакуль Ружанскую парафію не ўзначаліў выпускнік дзённага аддзялення Мінскай Духоўнай Семінарыі, малады і адукаваны святар Аляксандр Сень, які ўзяў на сябе груз аднаўлення царквы. Першапачаткова былі сабраныя ўсе жыхары вёскі, якія падтрымалі ініцыятыву айца Аляксандра. Паверыўшы святару і яго добрым намерам, кожны з жыхароў вырашыў ахвяраваць адну сваю пенсію. Некаторыя ахвяравалі і больш. Вынік не замарудзіў чакаць: былі закупленыя матэрыялы і пачалася праца. За год храм быў накрыты, а 19 снежня 2005 года купал храма увянчаў крыж.

Царква пабудавана вельмі незвычайна і нестандартна для гэтага краю. Будынак пабудаваны з бутавага каменя і цэглы, з рысамі раманскага стылю.

Будынак складаецца з трох асноўных частак: бабінец, малітоўная зала і апсіда. Над бабінцам узведзена чацверыковая вежа-званіца. Над асноўным аб'ёмам на васьмігранным барабане знаходзіцца купал-цыбуліна.