Парэчча. Царква Казанскай Божай Маці

У мястэчку Парэчча Гродзенскага раёна каля самай чыгункі знаходзіцца драўляная праваслаўная царква, якую асвяцілі ў гонар Казанскай Божай Маці.

У мястэчку ёсць некалькі помнікаў архітэктуры, гісторыі і нават пара музеяў. Тым больш, што ў гэтым мястэчку знаходзіцца першая чыгуначная станцыя ў Беларусі. Бо першая чыгунка прайшла менавіта тут яшчэ ў 19 стагоддзі па лініі Вільня – Гродна. Вакол чыгункі тут і бурліць жыццё з 19-га стагоддзя.

У 1899 годзе ўлады далі дазвол на пабудову школы імя А.С. Пушкіна. Праваслаўная царква ў Парэччы і Міністэрства транспарту ахвяравалі вялікія грашовыя сродкі.

З 1919 года горад уваходзіў у склад Польскай дзяржавы да 1939 года да прыходу савецкай улады. У часы Польшчы Парэчча было цэнтрам гміны ў Гродзенскім павеце Беластоцкага ваяводства.

Пасля далучэння да БССР у 1939 годзе стала цэнтрам Парэцкага раёна Беластоцкай вобласці.

Дакладна не вядома, калі была пабудавана першая царква. Старажытны храм згарэў падчас пажару ў 1863 годзе. У 1897 годзе вырашылі будаваць новую царкву, і быў пачаты збор сродкаў на святыню. Ужо ў 1901 годзе новы драўляны храм быў асвечаны.

Помнік мае прамавугольны ў плане выцягнуты будынак, які накрыты вальмавым дахам. Над бабінцам надбудавана чацверыковая вежа-званіца, якая завершана высокім чатырохгранным шатровым дахам і невялікім купалам–цыбулінай. Над асноўным аб'ёмам надбудаваны шырокі чацверык з шматгранным барабанам і купалам–цыбулінай.