Парэчча. Чыгуначны вакзал.

У мястэчку Парэчча Гродзенскага раёна ёсць некалькі помнікаў архітэктуры і даўніны. Тут пабудаваны ўнікальны каталіцкі касцёл з рысамі неаготыкі і мадэрну. Ёсць драўляная праваслаўная царква Казанскай Божай Маці. Але галоўнай «фішкай» мястэчка з'яўляецца будынак чыгуначнага вакзала.

Лічыцца, што менавіта ў Парэччы быў пабудаваны першы чыгуначны вакзал. Рух цягнікоў тут быў зроблены ў часы Расійскай імперыі ў 1862 годзе па лініі «Гродна – Парэчча». А сама чыгуначная лінія вяла з сталіцы імперыі ў Варшаву. Першы вакзал пабудавалі ў 1867 годзе і гэта быў першы вакзал на тэрыторыі Рэспублікі Беларусь, з якога пайшоў першы цягнік па тэрыторыі нашай краіны.

У сувязі з пракладкай чыгункі была пабудавана адпаведная інфраструктура: складскія памяшканні, паравознае дэпо, ваданапорная вежа і іншыя памяшканні і збудаванні.

У 20 стагоддзі чыгунка з станцыі Парэчча ішла ня толькі ў накірунку Вільні і Гродна, але яшчэ і на Друскенінкай, дзе знаходзіцца вядомы санаторый.

Мураваны будынак чыгуначнага вакзала быў пабудаваны ў першай палове 20 стагоддзя. Для будынка характэрныя рысы мадэрну з элементамі закапанскага стылю. Прыгажосць і масштаб вакзала ў маленькім мястэчку Парэчча звяртала на сябе ўвагу шматлікіх кінааператараў ў розныя часы і тут здымалася некалькі мастацкіх стужак.

Каля вакзала ўсталяваны макет старажытнага цягніка.