Асташына. Сядзіба Чачотаў

У Навагрудскім раёне ў мястэчку Асташына знаходзіцца сядзіба Чачотаў. Каб туды патрапіць трэба ехаць з Навагрудка на мястэчка Любча і з правага боку за некалькі кіламетраў да Любчы будзе Асташына. Сядзіба знаходзіцца паміж Асташына і вёскай Залозкі.

Даследчыкі адзначаюць, што Асташына з'яўляецца старэйшай вёскай у Навагрудскім раёне. Упершыню ўпамінаецца ў гістарычных крыніцах у 1401 годзе. Мястэчка ў тыя часы належыла князю Вітаўту. У 1428 годзе Вітаўт перадаў Асташына ў пажыццёвае валоданне сваёй жонцы Юльяне. Наступныя гаспадары былі Чартарыйскія, Саламярэцкія і магнаты Кішкі. У 17 – 18 стагоддзях ім валадарылі Радзівілы.

У 19 стагоддзі ў Асташыне быў пабудаваны мураваны палац сядзібы, якая належыла роду Чачотаў. У Вялікую Айчынную вайну палац згарэў, але быў адноўлены. У савецкія часы ў будынку працавала сярэдняя школа. Толькі ў 2004 годзе школа перастала знаходзіцца ў сядзібе.

Будынак палаца мураваны аднапавярховы з высокім цокальным паверхам. Помнік узведзены ў стылі класіцызму. Мае вялікія прамавугольныя вокны. Побач з сядзібай знаходзіцца парк і драўляны флігель. Да нядаўняга часу ў мястэчку быў драўляны двухпавярховы млын.