Ворша. Этнаграфічны музей «Млын».

Горад Ворша быў заснаваны ў тым месцы, дзе зліваецца невялікая рачулка Аршыца з Дняпром. І зараз там да нашага часу захаваўся помнік археалогіі замкавая гара. У пачатку 20 - га стагоддзя на Аршыцы недалёка ад замкавай гары быў пабудаваны з чырвонай цэглы двухпавярховы вадзяны млын, а побач цагляны мост. Млын з'яўляецца помнікам прамысловай архітэктуры. З 1995 года ў будынку млына адкрыты этнаграфічны музей «Млын», які з'яўляецца філіялам Музейнага комплексу гісторыі і культуры Аршаншчыны. Першая частка экспазіцыі носіць назву «Хлеб наш надзённы». Тут распавядаецца пра сялянскую працу па вырошчванню хлеба. Прадстаўлены экспанаты, бытавыя рэчы, якія выкарыстоўвалі сяляне ў час пасеву і жніва. У другой частцы экспазіцыі пад назвай «Святло душы і таленту» наведвальнікі пазнаёмяцца з прадметамі духоўнай культуры. У музеі прадстаўлена вялікая калекцыя даматканых рушнікоў, народных касцюмаў, іконы і керамічны посуд. Ёсць і зала для правядзення часовых выставаў на ніжняй палове млына. На галоўным фасадзе млына захавалася дата пабудовы будынка – 1902 год. У музем можна набыць сувеніры.