Мсцібава. Касцёл Яна Хрысціцеля

У цэнтры мястэчка Мсцібава Ваўкавыскага раёна знаходзіцца мураваны касцёл, які асвечаны ў гонар Святога Яна Хрысціцеля. Першы касцёл у мястэчку пабудаваны ў 15 стагоддзі ў часы Вялікага Княства Літоўскага. Па іншым звестакам першы касцёл заснавала каралева Бона Сфорца ў 16 стагоддзі і храм назвалі ў гонар Яна Хрысціцеля.

 Драўляны храм быў знішчаны шведскім войскам у 1700 годзе ў час Паўночнай вайны. На сродкі старасты Мсцібава Казіміра Агінскага касцёл драўляны аднавілі ў 1715 годзе.  У 1770 годзе праведзена рэканструкцыя храма.

У часы Расійскай імперыі ў 1849 годзе храм пашкоджаны ў час буры і быў адноўлены за сродкі паноў Талочкаў і Ельскіх.  Новы мураваны касцёл пачалі будаваць летам 1910 года. А дабудавалі ўжо ў часы Польскай дзяржавы ў 1922 годзе.

Сродкі на новы храм збіралі сярод прыхаджан. Помнік двухвежавая базіліка з трансептам. Мае трохгранную апсіду. Галоўны фасад складаецца з трох частак: трохвугольным шчытом завершана цэнтральная частка, а па бакам трохярусныя вежы. Вуглы вежаў галоўнага фасада, трансепта і апсіды маюць контрфорсы.

Інтэр'ер касцёла падзелены на тры нефа. Галоўны алтар створаны ў стылі неаготыкі і мае цудадзейны алтар абраза Маці Божай. Маецца яшчэ некалькі алтароў. Перад касцёлам пабудавана двухярусная вежа – званіца з жоўтай цэглы.