Магілёў. Флігель Спаскага манастыра.

З 15-га стагоддзя ў Магілёве вядомая праваслаўная Спаская царква. З часам быў утвораны Спаскі манастыр, які займаў у цэнтры горада цэлы квартал. Драўляныя будынкі манастыра былі знішчаны пажарам падчас Паўночнай вайны ў 1708 годзе, і ў сярэдзіне 18-га стагоддзя манастыр будуецца ўжо каменны. Спаская царква не захавалася да нашага часу. Але ёсць некалькі будынкаў ад архітэктурнага ансамбля Спаскага манастыра: палац біскупа Георгія Каніскага, вароты і 2 флігеля. У флігелі, што знаходзіцца з правага боку ад брамы да рэвалюцыі размяшчалася кансісторыя. Кансісторыя - гэта самая галоўная адміністрацыйная ўстанова ў Магілёўскай праваслаўнай епархіі.

А пасля рэвалюцыі, у першыя гады савецкай улады, тут было ЧК Магілёўскай губерні. Потым у будынку ў савецкія часы былі жылыя кватэры. Унутры двара была пясочніца для дзяцей, стаялі лаўкі, а ля самай брамы была калонка для вады, бо многія будынкі ў гістарычным цэнтры, як і флігель Спаскага манастыра, не былі абсталяваны вадаправодам. Пасля распаду Савецкага Саюза памяшканні флігеля былі выкупленыя прадпрымальнікамі, зроблены рамонт і тут адкрылі крамы і кафэ.

Цяпер у падвале флігеля працуе"Эдысан Бар". Гэта вельмі атмасфернае месца. Вы прыходзіце ў бар, спускаецеся ў падвал, і над вамі скляпеністыя столі з чырвонай цэглы.... Акрамя самога архітэктурнага антуражу, тут вельмі добрая кухня. Вам спадабаецца). Калі дадзенае месца наогул, а таксама дадзены сайт у прыватнасці вам спадабаецца - пакіньце пад кілімком ля выхаду 1 рубель :)).

Флігель пабудаваны ў стылі позняга барока з элементамі класіцызму. Пры аглядзе помніка звярніце ўвагу на яго незвычайна вострыя куты, якія ў архітэктуры сустракаюцца досыць рэдка.