Мештавічы. Сядзіба роду Бранцоў і Скірмунтаў.

У Зэльвенскім раёне да нашага часу захавалася сядзіба ў мястэчку Мештавічы. Упершыню мястэчка згадваецца ў гістарычных крыніцах у 16 стагоддзі з часоў Вялікага Княства Літоўскага. У 17 стагоддзі належала Скуратам: у 1690 годзе тут гаспадарылі Фларыян і Павел Скуратыя.

Частка сядзібы належала Ваўкавыскаму гараднічаму Станіславу Тулаўскаму. У канцы 18-га стагоддзя гаспадарыў у мястэчку Алаізій Бранец. У 1890 годзе сядзіба мела 231 дзесяціну зямлі і валодаў ёю Іван Бранец. Наступнымі гаспадарамі да 1939 года да прыходу савецкай улады былі Скірмунты. Апошні ўладальнік - Скірмунт Баляслаў.

 Сядзіба пабудавана ў канцы 19-га стагоддзя ў часы Расійскай імперыі ў стылі эклектыкі. Плошча сядзібы разам з садам складае шэсць гектараў.

 З ясеня высаджана ўязная алея. Захавалася да нашага часу мураваная ўязная брама ў выглядзе двух пілонаў. На адным з пілонаў ёсць дата пабудовы - 1885 год.

Дамінантай сядзібы з'яўляецца гаспадарскі дом, які размешчаны ў цэнтры. Будынак гаспадарскі каменны аднапавярховы. Добра захаваўся да нашага часу. Побач знаходзіцца некалькі каменных гаспадарчых пабудоў.

Падчас вайны ў сядзібе знаходзіўся шпіталь. Побач на тэрыторыі сядзібы ўсталяваны помнік памерлым савецкім салдатам - усяго пахавана 290 воінаў.