Міжэрычы. Царква Святой Ганны.

Праваслаўная царква ў мястэчку Міжэрычы была пабудавана ў 1904 годзе. Царква каменная, пабудавана з цэглы. Будаўнічы матэрыял вырабляўся на спецыяльна пабудаваным заводзе ў 1903 годзе.

Існуе версія, што спачатку на гэтым месцы пачалі каталікі будаваць каталіцкі касцёл, які вывелі да ўзроўню вокнаў. Але высокае начальства, якое было праваслаўным, забараніла каталікам тут будаваць свой Касцёл і аддало гэты ўчастак пад праваслаўную царкву, а пад касцёл выдзелілі іншы кавалак зямлі.

Пасля Вялікай Айчыннай вайны царкву зачынілі ў 1950-х гадах. Будынак быў прыстасаваны пад збожжасховішча. Перад самым развалам Савецкага Саюза ў 1987 годзе царкву перадалі праваслаўным вернікам. Быў праведзены рамонт і з 1989 года царква зноў пачала працаваць.

Будынак узведзены ў рэтраспектыўна-рускім стылі па тыпавым праекце. Складаецца царква з трох асноўных частак: бабінец, трапезная, малітоўная зала і апсіда. Над бабінцам двух'ярусная вежа-званіца, якая прарэзана чатырма вокнамі. Званіца васьмярык на чацверыку. Малітоўная зала кубападобны аб'ём перакрыты чатырохсхільным дахам над якім васьмігранны барабан з цыбулінай. Фасады царквы ўпрыгожаны какошнікамі, як старажытнарускія храмы.

Пры ўваходзе да царкоўнай плошчы пабудавана двух'ярусная каменная брама-званіца, якая аздоблена фрэскавымі роспісамі з выявамі евангелістаў. Царква абнесена каменнай агароджай.