Лясная. Помнік драматургу Уладзіславу Галубку.

У мястэчку Лясная Баранавіцкага раёна ёсць некалькі помнікаў гісторыі і даўніны. Цэнтрам мястэчка з'яўляецца чыгуначная станцыя, якая была пабудавана за часамі Польскай дзяржавы ў 1925 годзе ў закапанскім стылі.

Каля станцыі ўсталяваны помнік, скульптура савецкага салдата на месцы брацкай магілы, дзе пахаваны савецкія воіны і ваеннапалонныя, якія загінулі ў лагеры смерці каля Лясной.

Каля чыгуначнай станцыі ўсталяваны памятны валун, які прысвечаны земляку, выбітнаму беларускаму нацыянальнаму дзеячу Уладзіславу Галубку.

Уладзіслаў Іосіфавіч Галубок (1882 - 1937) – Народны артыст Беларусі, беларускі драматург і празаік, актор і мастак, пісьменнік і тэатральны рэжысёр.

Нарадзіўся ў мястэчку Лясная ў сям'і рабочага чыгуначніка Іосіфа Голуба. Пачатковую адукацыю атрымаў у Мінску. Працаваць таксама пайшоў у Мінску. З юнацтва наведваў тэатр. Граў у аркестры дабраахвотнага пажарнага таварыства на трамбоне. Вучыўся маляванню ў вядомых мастакоў Мінска. Пачаў друкаваць у мясцовых газетах вершы і апавяданні. У 1913 годзе выйшла першая кніжка «Апавяданні». У часы рэвалюцыі ўступае разам з жонкай і дзецьмі ў «Першае беларускае таварыства драмы і камедыі».

Быў створаны вандроўны беларускі дзяржаўны тэатр, дзе кіраўніком прызначылі У. Галубка. П'есы ставіліся пераважна беларускіх класікаў і самога Галубка. У трупу ўвайшлі некалькі сябраў У. Галубка, яго сын, тры дачкі і жонка. Пэўны час акторамі ў тэатры працавалі вядомыя беларускія пісьменнікі: Алесь Дудар, Міхась Чарот, Васіль Сташэўскі і іншыя.

Тэатр праводзіў актыўную грамадскую асветніцкую працу. Але ўсё было знішчана ў 1930–я гады ў часы Сталінскіх рэпрэсій. Самога У. Галубка арыштавалі ў 1937 годзе. Пасля арышту загінуў драматург у турме, або ў высылке. Дагэтуль дакладна невядома.

Рэабілітаваны ў 1957 годзе.

У Лясной на будынку мясцовай школы ўсталявана памятная шыльда, прысвечаная У. Галубку.