Ліпск. Касцёл Дзевы Марыі

У мястэчку Ліпск Ляхавіцкага раёна ёсць мураваны каталіцкі касцёл, які асвяцілі ў гонар Дзевы Марыі.

Упершыню Ліпск сустракаецца ў дакументах у 1492 годзе. У часы Вялікага Княства Літоўскага ўваходзіў у склад Навагрудскага павета Навагрудскага ваяводства. У 1700 годзе ўпамінаецца першы каталіцкі касцёл, які быў драўляны з двухвежавым фасадам.

 Новы мураваны  касцёл  пабудаваны ў 1910 годзе. Храм узведзены за сродкі графа Патоцкага і клопатамі ксяндза К. Ваньковіча. Касцёл быў моцна пашкоджаны ў час Першай сусветнай вайны. Святыня была адноўлена ў часы Польскай дзяржавы пры ксяндзу М. Каладзеі.

 Касцёл мае стыль эклектыкі. У архітэктуры будынка прысутнічаюць рысы класіцызму, барока і элементы ракако. Касцёл трохнефная базіліка і мае бакавыя сакрысціі. Над галоўным фасадам была надбудавана чатырохгранная вежа – званіца з неабарочным купалам, які завершаны высокім шпілем. На галоўным фасадзе была створана балюстрада з дэкаратыўнымі вазамі.

Шматярусная вежа была знішчана ў час Першай сусветнай вайны. Дэкор на бакавых фасадах і часткова на галоўным фасадзе захаваўся да нашага часу. У апошнія гады касцёл быў адрамантаваны.