Княжыцы. Касцёл святога Антонія.

У 1681 годзе, тагачасны ўладальнік Княжыцай надворны харунжы Канстанцін Уладзіслаў Пац, выдаткаваў сродкі на пабудову ў Княжыцах кляштара дамініканаў. Спачатку быў пабудаваны невялікі драўляны храм. У 1750-м годзе на яго месцы пачалося будаўніцтва велічнага каменнага касцёла, дзякуючы ахвяраванням нашчадкаў Канстанціна Паца, а таксама шляхцічаў Крукоўскіх. У 1780 годзе будаўніцтва было завершана, і касцёл быў асвечаны ў гонар Святога Антонія Падуанскага.

Пасля паўстання Кастуся Каліноўскага, у 1863 годзе касцёл зачынілі на шэсць гадоў, пасля чаго яго напаткаў лёс многіх каталіцкіх храмаў - яго ператварылі ў праваслаўную царкву (Аляксандра Неўскага). Вонкавы выгляд будынка асабліва не змяніўся, з'явіліся толькі тры купалы. З перапынкамі царква функцыянавала да 1965 года. З гэтага моманту і да сённяшняга дня храм закінуты.

Нягледзячы на аварыйны стан выбітнага помніка беларускай сакральнай архітэктуры, размах будынка па-сапраўднаму ўражвае. Храм уражвае сваім маштабам і манументальнасцю, адчуваецца былая веліч некалі цудоўнага касцёла. Вышыня столі дасягае тут 15 метраў, але за кошт адсутнасці цэнтральных калон канструкцыя выглядае лёгкай і паветранай. Ляпніна і фрэскі, якія ўпрыгожвалі будынак да цяперашняга часу практычна страчаны, і з кожным годам іх стан толькі пагаршаецца. Касцёл знаходзіцца ў паўразбураным стане, і аглядаць яго ў непасрэднай блізкасці - небяспечна.

Будынак касцёла з'яўляецца гісторыка-культурнай каштоўнасцю Беларусі, другой катэгорыі.