Мсціслаўль. Касцёл кармелітаў.

Касцёл Дзевы Марыі знаходзіцца ў вельмі маляўнічым месцы Мсціслаўля - каля абарончага рва, праз які бачная Замкавая гара. А калі ўзняцца на вежу касцёла, то адкрываецца незвычайная панарама старажытнага горада… Асноўны корпус касцёла быў пабудаваны яшчэ ў пачатку 17 стагоддзя. Тады ж, у 17 стагоддзі, былі зроблены і фрэскавыя роспісы інтэр’ера – 20 кампазіцый. Сярод іх ёсць 2 фрэскі на гістарычную тэматыку: “Забойства ксяндзоў” і “Трубяцкая разня”, якія распавядаюць пра трагічныя падзеі ў горадзе 1654 года, калі Мсціслаўль быў спалены маскоўскім войскам па загадзе ваяводы Трубяцкога. У пачатку 18 стагоддзя касцёл быў перабудаваны ў стылі позняга віленскага барока па праекце вядомага архітэктара Іагана Глаўбіца. У інтэр’еры захавалася 6 алтароў, аздобленых ляпнінай і скульптурамі. Ёсць сутарэнні. У касцёле захаваўся камін 18 стагоддзя, які дзейнічае да гэтага часу. У гэтым храме хрысцілі Лявона Вітан-Дубейкаўскага, які паходзіць з мясцовай шляхты. Гэта вядомы беларускі пісьменнік, будаўнік, архітэктар, палітычны і грамадскі дзеяч. У пасляваенны час каля касцёла праводзілі раскопкі археолагі Алег Трусаў і Міхась Ткачоў, якія з’яўляюцца ўраджэнцамі Мсціслаўля. Інтэр’ер касцёла разам з фрэскамі патрабуе рэстаўрацыі.