Гродна. Былы касцёл Святога Духа (вул.Савецкая, 14).

У горадзе Гродна на пешаходнай вуліцы Савецкай (дом нумар 14) знаходзіцца помнік архітэктуры 18 - 19-га стагоддзя - былы будынак касцёла і кляштара Святога Духа.

Касцёл і шпіталь Святога духа на гэтым месцы былі пабудаваныя яшчэ ў 16 стагоддзі ў часы Вялікага Княства Літоўскага на грошы каралевы Боны Сфорца.

Пры касцёле быў прытулак для бяздомных і хворых. Касцёл у пачатку 19-га стагоддзя ў часы Расійскай імперыі перабудавалі пад Дом міласэрнасці.

Першы раз касцёл перабудавалі ў 1792 годзе на сродкі віленскага біскупа Ігната Масальскага. Быў дабудаваны другі паверх. У 19 стагоддзі дом перабудоўвалі некалькі разоў.

Пасля антырасійскага паўстання 1863-1864 гадоў гэты будынак набывае купец Абель Тарлоўскі. Потым перапрадаў дом Ёну Хазэ. Яго сын Шмуэль перабудаваў дом пад гасцініцу "Славянская". Таксама, адначасова тут працавалі розныя ўстановы: цырульня Фрэнкеля, пякарня Салавейчыка, крама па продажы мэблі Урансона, крама па гандлі садавінай Цывы Мышкоўскай, галантарэйны магазін Смаженовича, крама пахавальных прыладаў Г.Баўма, суконны магазін і кравецкая майстэрня Маркуса Прэнскага. Тут была кватэра лекара М.Хлявінскага.

У часы Польскай дзяржавы будынак належыць тром уласнікам: Самуэлю Хазэ, Філійсу Назарку і Хошы Фрухту. У памяшканнях працавала сталовая, гатэль пашырылі і мадэрнізавалі, гандлёвы дом «Палонія», рэдакцыя газеты, рэстаран Райнера, гарнізоннае казіно, выдавецтва і кнігарня, кандытарская.

Пасля вайны ў будынку былі абласны камітэт Кампартыі Беларусі, потым гарвыканкам, кнігарня "Навука" і іншыя ўстановы. Цяпер тут кавярні і крамы.