Гарадная. Царква Святой Троіцы

На захад ад раёнага горада Столін ёсць старажытнае мястэчка Гарадная з некалькімі помнікамі гісторыі. Пасярод мястэчка пабудавана праваслаўная царква Святой Троіцы 18 стагоддзя. Царква была пабудавана ў часы Вялікага Княства Літоўскага і належыла вернікам уніяцкай канфесіі. У 19 стагоддзі ў перыяд Расійскай імперыі, калі ўніяцтва было забаронена храм перайшоў да праваслаўных. Царква была значна перабудава ў 1930 – я гады, калі мястэчка ўваходзіла ў склад Польскай дзяржавы. У гэты час да царквы прыбудавалі чацвярыковую вежу – званіцу.

 Царква пабудавана ў традыцыях палескага народнага драўлянага дойлідства. Будынак складаецца з трох асноўных частак: прытвор, малітоўная зала і апсіда. Над прытворам надбудавана вежа – званіца, якая накрыта чатырохскатным дахам. Асноўны аб'ём разам з апсідай накрыты вальмавым дахам, які завершаны чатырохграным барабанам з невялікім купалам – цыбулінай.

У інтэр'еры ёсць іканастас, хоры і старажытныя абразы  17 – 18 стагоддзяў. Сярод абразоў ёсць «Маці Божая»,  «Святы Мікола», «Спас Пантакратар» і «Маці Божая Чанстахоўская».