Лебяда. Царква Святога Мікалая

Побач з вёскай Мажэйкава, што на трасе Ліда – Шчучын, знаходзіцца невялікая вёска Лебяда. На самай ускраіне вёскі пабудавана мураваная праваслаўная царква ў гонар Святога Мікалая.

Першы праваслаўны храм быў драўляны і час яго дакладнай пабудовы невядомы. У дакументах 1869 года ёсць апісанне драўлянай царквы: «Церковь зданием деревянная с 4 – х столбной колокольней, нуждающейся в исправлении и починке». У 1887 – 1891 гадах святаром тут служыў Савацій Елізерскі, які ў 1888 годзе напісаў хадатайства аб пабудове новай царквы за казённы кошт.

У 1891 годзе святаром у Лебядзе служыў Сяргей Іванавіч Марозаў і ў гэты час пры ім будаўніцтва новага храма было завершана. Храм будаваўся пад назіраннем будаўнічага камітэта, дзе старшыня быў мясцовы святар і шэсць сялянаў. К лістападу 1900 года царква была дабудавана канчаткова і адбылося асвячэнне святыні. У 1903 годзе была адчынена жаночая царкоўна – прыхадская школа, дзе кіраўніком была настаўніца Аляксандра Котляр. Школа налічвала 22 вучаніцы. З 1908 года святаром пры царкве пачаў служыць Мікалай Альбаў. Пры ім ужо працавала пры прыходзе 2 царкоўна – прыхадскія школы і 2 народных вучылішча. У 1912 годзе прыхаджан налічвалася 1, 5 тысячы чалавек. У савецкія часы царква не зачынялася і нават удалося ў гэтыя гады правесці рамонт.

Царква пабудавана па ціпавому праекту ў псеўда – рускім стылі. Складаеца з 4 асноўных частак: прытвор, трапезная, малітоўная зала з апсідай. Над прытворам вежа – званіца васьмярык над чацвярыком. У інтэр'еры іканастас двухярусны.