Дубое. Царква Нараджэння Божай Маці

У мястэчку Дубое Пінскага раёна ёсць шмат розных гістарычных помнікаў: парк, парэшткі сядзібы, капліца, водныя каналы і многае іншае. Мясцовы парк і сядзіба былі вядомыя на ўсю Рэч Паспалітую і сюды ў 1784 годзе завітаў у госці апошні кароль і Вялікі Князь Літоўскі Станіслаў Аўгуст Панятоўскі.

А пасярод мястэчка знаходзіцца мураваная праваслаўная царква Нараджэння Маці Божай.

Храм быў пабудаваны ў 1811 годзе на сродкі Клацільды Кужэнецкай у стылі класіцызму. Род Кужэнецкіх быў уладальнікам мясцовага маёнтка. Царква першапачаткова належыла ўніятам, а потым, пасля забароны ўніі ў 19 стагоддзі перайшла да праваслаўных вернікаў. Крыху пазней каля царквы была пабудавана драўляная званіца і дом для святара.

Царква мае цэнтрычную кампазіцыю з васьміграннай формай інтэр'ера. Асноўны аб'ём накрыты гранёным сферычным купалам. Крыху пазней да асноўнага аб'ёму быў прыбудаваны прытвор, які, як і апсіда накрыты двухскатным дахам. У інтэр'еры ёсць хоры, якія трымаюцца на драўляных калонах. Часткова захаваліся фрэскавыя роспісы ў тэхніцы грызайль. Ёсць трохярусны іканастас. Царква адрэстаўравана.

Непадалёк ад царквы захаваўся драўляны дом для святара.