Бярозавічы. Пакроўская царква

У Пінскім раёне, як ехаць па трасе М 10 з Брэста на Пінск з левага боку ёсць мястэчка Бярозавічы. Да 1964 года Бярозавічы мелі гістарычную назву Паршэвічы.

Упершыню Паршэвічы ўпамінаюцца ў 1492 годзе ў часы Вялікага Княства Літоўскага. У гэтыя часы княгіня Марыя з Пінскага княства падаравала мястэчка Фурсу Івановічу. Затым у 16 стагоддзі Паршэвічы ўваходзілі ў склад Пінскага павета Брэсцкага ваяводства. Пасля другога падзелу Рэчы Паспалітай у 1793 года ў складзе Пінскага ўезда. У 17 стагоддзі на сродкі пана Яна Фралевіча была ўзведзена драўляная капліца. У часы Расійскай імперыі ў 1878 годзе храм перабудавалі і значна пашырылі і царкву асвяцілі ў гонар Пакрава Прасвятой Багародзіцы. Царква ў апошнія гады была адрэстаўравана. Храм дзейнічае.

 Царква складаецца з трох асноўных частак: прытвор, асноўны аб'ём і апсіда. Прытвор двухярусны з трохвугольным франтонам. Малітоўная зала квадратная ў плане і накрыта чатырохскатным дахам. На даху ўсталяваны васьмігранны барабан з невялікай цыбулінай. Да асноўнага аб'ёму прыбудавана пяцігранная апсіда з двумя сакрысціямі. Фасады храма ўпрыгожаны дэкаратыўнай рэззю па дрэву.