Чарнеевічы. Парк Скірмунтаў.

Мястэчка Чарнеевічы знаходзіцца на самым захадзе горада ПІнска і з'яўляецца ўжо практычна прыгарадам горада. Тут захаваўся старадаўні парк з вадаёмам. Упершыню Чарнеевічы ўпамінаюцца ў гістарычных крыніцах у 15 стагоддзі. Пінская княгіня Марыя ў 1495 годзе выдала прывелей шляхцічу Фурсу Іванавічу на валоданне маёнткам у Чарнеевічах.

 У Фурса Іванавіча было чатыры сыны: Сымон, Венядзікт, Апанас і Рыгор. Мястэчка Чарневічы па спадчыне атрымаў сярэдні сын Венядзікт, які служыў у пінскага князя Фёдара. Пасля Фурсаў новымі гаспадарамі мястэчка былі Нелюбовічы.

У 19 стагоддзі гаспарамі ўжо сталі прадстаўнікі роду Скірмунтаў. Напрыканцы 19 стагоддзя Вікенцій Скірмунт валодаў сядзібай з паркам і гаспадарчымі пабудовамі. У тыя часы плошча маёнтка ў Чарнеевічах складала 410 дзесяцін зямлі.

У Першую сусветную вайну і да 1920–х гадоў тут былі новыя гаспадары з роду Галовічаў. Потым маёнтак зноў вярнуўся да Скірмунтаў, які ім належыў да 1939 года.

Скірмунты ў 19 стагоддзі ў Чарнеевічах пасадзілі пейзажны парк і пабудавалі палац. Будынак быў зруйнаваны ў пасляваенны перыяд. Да нашага часу захаваўся невялікі парк плошчай каля 6 гектараў. У парку ёсць некалькі сажалак, алеі і каналы. Тут растуць вязы, каштаны, ліпы і грабы. Парк знаходзіцца ў занядбаным стане. Сажалкі абмялелі і зарастаюць хмызняком.