Дубое. Сядзібны парк Кужанецкіх.

Самае старое месца ў Дубаі - гэта французскі парк. Французскім ён называецца таму, што спраектаваны ён быў па ўзорах французскага архітэктара Ленотра. Парк спраектаваны так, што на адной лініі знаходзяцца ўязная брама і сажалка, у якой адбівалася сонца. Да гэтага часу ў ім бачныя каналы, сажалкі, апоры, на якіх калісьці ляжалі масткі. Тут расце 460-гадовы дуб, менавіта ад гэтых дрэў і атрымала сваю назву вёска. У парку вельмі шмат старажытных дрэў, некаторым з іх больш за 100 гадоў.

На ўскрайку парка стаіць драўляны крыж. Тут да 1636 г. знаходзіўся мужчынскі манастыр. Сядзібны дом не захаваўся, бо перад сваім адступленнем яго ўзарвалі нацысты.

Каго толькі не памятае парк. Тут быў нават сам кароль Станіслаў Панятоўскі, які прыехаў палюбавацца мясцовымі прыгажосцямі і адкрыццём Днепра-Бугскага канала, часткай якога ў гэтым месцы стала рака Піна.

Побач з паркам размешчаны могілкі часоў Першай сусветнай вайны. Тут спачываюць рускія і нямецкія салдаты. Сюды на магілы прыязджаюць нашчадкі нямецкіх салдат. На могілках знаходзіцца маленькая драўляная капліца. Ёй больш за сто гадоў.

Цікавы і касцёл Узвіжання Крыжа Гасподняга, пабудаваны ў другой палове 18 стагоддзя яшчэ езуітамі. Унутранае ўбранне храма не захавалася - фрэскі пад шчыльным пластом пабелу, у падвале склеп з невядомымі пахаваннямі, ля сцяны стаіць драўлянае распяцце. Яго дастала з сажалкі мясцовая жыхарка, схавала і захавала, а перад смерцю перадала гэты крыж.

На месцы былога кляштара ў 1811 годзе быў пабудаваны невялікі храм. Ініцыятарам будаўніцтва была дачка першых уладальнікаў мястэчка Дубое Клатыльда Кужанецкая. Царква па форме прамавугольная, выканана ў стылі класіцызму. Храм упрыгожаны пілястрамі, а па перыметры - дэкаратыўным карнізам. Вокны ў храме арачныя і гэта надае дадатковае цікавае аблічча царквы. На тэрыторыі храма захавалася драўляная званіца, пабудаваная ўжо ў другой палове 19 стагоддзя, калі царква стала праваслаўнай. Крыху далей храма знаходзіцца старадаўняя драўляная хата святара, пабудаваная ў пачатку 20 стагоддзя.

На выездзе з Дубоі можна ўбачыць і ўчастак легендарнай трылінкі -дарожнага пакрыцця, вынайдзенага 100 гадоў таму інжынерам Уладзіславам Трылінскім (пліткі-шасціграннікі, кожная грань якога 20 см).

Палессе - гэта цудоўнае месца ў Беларусі, адзначана цудоўнай прыродай, гістарычнымі падзеямі, многімі славутасцямі, імёнамі нашых суайчыннікаў. Гэта менавіта тое месца, дзе вельмі добра разважаецца пра мінулае, сучаснасць і будучыню нашай краіны.