Дабрамысль. Царква Святога Мікалая

У Івацэвіцкім раёне на ўскрайку мястэчка Дабрамысль знаходзіцца мураваная праваслаўная царква, якую асвяцілі ў гонар Святога Мікалая. Царква пабудавана ў часы Расійскай імперыі ў 1847, або ў 1874 годзе. Бо ёсць розная інфармацыя пра час пабудовы храма. Прыход у Дабрамыслі да 1929 года адносіўся да благачынія ў Быцені. А пасля пачаў адосіцца да Баранавіцкага.

Храм пабудаваны па тыпавому праекту. Помнік узведзены ў рэтраспектыўна – рускім стылі. Такія праекты некалькі штук былі распрацаваныя ў 19 стагоддзі. І тыпавыя храмы па тэрыторыі Расійскай імперыі будаваліся масава.

 Будынак складаецца з чатырох асноўных частак: прытвор, трапезная, малітоўная зала і апсіда. Над прытворам надбудавана двухярусная чацвярыковая вежа – званіца. Над асноўным аб'ёмам узведзены невялікі васьмігранны барабан з купалам – цыбулінай.

 У інтэр'еры маецца драўляны іканастас. Ёсць старажытныя абразы 18 стагоддзя: «Святы Мікалай» і «Маці Божая Адзігітрыя». Ёсць таксама драўляная скульптура «Укрыжаванне». Побач з храмам некалькі старажытных павхаванняў святароў. Будынак у апошнія гады адрамантаваны. Тэрыторыя побач добраўпарадкавана.