Дзяляцiчы. Царква Узвышэння Святога Крыжа.

У Навагрудскім раёне ў мястэчку Дзеляцічы, што знаходзіцца на беразе ракі Нёман, у цэнтры мястэчка пабудавана праваслаўная Царква Узвышэння Святога Крыжа.

Мястэчка мае даўнюю гісторыю і ўпершыню згадваецца ў 14 стагоддзі ў часы Вялікага Княства Літоўскага. Належала вялікаму князю Вітаўту, і ў 1428 годзе князь перадаў мястэчка ў валоданне сваёй жонцы Юліяне. У 17 стагоддзі належала Радзівілам.

Быў тут пабудаваны кальвінскі збор, бровар, млын, карчма і царква. У часы Расійскай імперыі ў 1870-я гады меліся два млыны, карчма, крама, 2 царквы і школа.

У 1876 годзе на мясцовых могілках была пабудавана драўляная праваслаўная царква. Каля храма ўзведзена двух'ярусная мураваная званіца з бутавага каменя.

Царква пабудавана ў традыцыях драўлянага народнага дойлідства. Складаецца з чатырох асноўных архітэктурных частак: бабінец, трапезная, малітоўная зала і апсіда. Над асноўным аб'ёмам узведзены чатырохсхільны дах з невялікім гранёным барабанам і цыбулінай–вежкай. Тэрыторыя храма абгароджана каменным плотам. Царква дзейнічае.