Вялікая Лысіца. Царква Узвышэння Святога Крыжа.

       У Нясвіжскім раёне ў мястэчку Вялікая Лысіца на мясцовых могілках пабудавана мураваная праваслаўная царква, якую асвяцілі ў гонар Узвышэння Святога Крыжа. Наведаць і паглядзець помнік вельмі проста, бо мястэчка знаходзіцца побач з трасай М1.

           Царкву пачалі будаваць у часы Расійскай імперыі ў 1905 годзе. Завяршылі будаўніцтва ў 1915, або ў 1918 годзе. Побач знаходзіўся старажытны драўляны храм, які ў савецкія часы разабралі на дровы для мясцовай школы.

      Святыня будавалася за сродкі прыхаджан і мецэнатаў. Кіравалі будаўніцтвам і зборам сродкаў жыхары мястэчка: Пётр Малейка і Міхаіл Сень, якія пахаваны побач каля алтара храма. У царкве каля дваццаці год служыў пратаірэй Матвей Крыцук, які па даносу ў 1950 годзе быў арыштаваны.

        Царкву зачынілі ў 1960 годзе. У гэты час мясцовыя жыхары аберагалі храм і не давалі яго руйнаваць. Напрыканцы існавання Савецкага Саюза ў 1990 годзе царкву вярнулі праваслаўным вернікам. Пачаўся збор сродкаў і рамонт, які працягваўся доўгі час. І толькі ў 2015 годзе храм зноў аднавілі і асвяцілі.

       Помнік узведзены на ўзвышшы і з'яўляецца архітэктурнай дамінантай мястэчка. Узведзены ў неарускім стылі з чырвонай цэглы і гранітных блокаў. Падмурак гранітны. Складаецца будынак з чатырох асноўных частак: прытвор, трапезная, малітоўная зала і апсіда. Над прытворам надбудавана вежа–званіца.

       Тэрыторыя каля храма добраўпарадкавана.