Рудаўка. Сядзібны дом.

   У прыгарадзе Рудаўка горада Нясвіж пабудаваны каменны аднапавярховы палац. Рудаўка вядомая яшчэ з часоў Вялікага Княства Літоўскага з 16-га стагоддзя. Гэта быў пасёлак за горадам Нясвіж. Пасёлак паступова разбудаваўся, і мястэчка цяпер з'яўляецца прыгарадам.

           Палац каменны, аднапавярховы, узведзены на мяжы 19-20-га стагоддзяў у стылі неакласіцызму.

       Сядзіба ў Рудаўцы належала спачатку магнатам Радзівілам. Потым Радзівілы прадаюць сядзібу роду Корбутаў. У канцы 18-га стагоддзя ў сядзібе быў палац і флігель для гасцей. Вакол сядзібы быў пасаджаны сад. У канцы 18-га стагоддзя Кацярына Корбут выйшла замуж за маёра кавалерыі князя Ануфрыя Масальскага.

        У 1799 годзе ў гэтай сядзібе нарадзіўся вядомы пісьменнік, філолаг і этнограф Эдвард Тамаш Масальскі (1799-1879). Эдвард атрымаў добрую адукацыю і вучыўся ў Полацку, Магілёве, у Віленскім універсітэце. Падчас навучання ва ўніверсітэце ўваходзіў у таемную арганізацыю філарэтаў. Жыў у Пецярбургу і ў Варшаве. У Пецярбургу быў рэдактарам часопіса "Баламут". З'яўляецца аўтарам твораў "Аб славянскіх скарбах", "Граматыка польскай мовы", "Звычай пінчукоў і беларуса " і іншых прац. Напісаў таксама мемуары.