Пратасаўшчына. Капліца-пахавальня Шастоўскіх.

     У мястэчку Пратасаўшчына Пухавіцкага раёна знаходзіцца каменная капліца Шастоўскіх. Пасёлак знаходзіцца на поўдзень ад вялікага мястэчка Шацк. І паміж вёскай Задашчэнне і Пратасаўшчына ў мясцовым лесе злева ад трасы знаходзіцца капліца.

         Мястэчка Пратасаўшчына ў 18 стагоддзі ў часы Вялікага Княства Літоўскага ўваходзіла ў склад Мінскага павета Мінскага ваяводства. Належала мястэчка вядомаму беларускаму шляхецкаму роду Аскерак. 

           Пасля другога падзелу Рэчы Паспалітай у 1793 годзе, мястэчка ўвайшло ў склад Расійскай імперыі. У 19 стагоддзі Пратасаўшчына мела статус засценка ў Шацкай воласці Ігуменскага павета Мінскай губерні. У 1897 годзе ў мястэчку ўсяго мелася 10 двароў і 59 жыхароў.

       У часы Першай сусветнай вайны ў 1918 годзе гэтая тэрыторыя была пад акупацыяй кайзераўскіх нямецкіх войскаў. У пачатку 1919 года ўвайшла ў склад Савецкай Беларусі. У 1919-1920 гадах пад акупацыяй польскіх войскаў. З лета 1920 года зноў у складзе БССР.

        Каля Пратасаўшчыны ў бліжэйшым лесе ў 1860 годзе была пабудавана каменная Капліца–пахавальня, якая належала роду Шастоўскіх. Перад капліцай пабудаваныя каменныя вароты. Храм узведзены з бутавага каменя. Паміж вялікімі камянямі выкладзеныя ўзоры маленькімі каменьчыкамі ў тэхніцы так званай разынкавай кладкі. Будынак у плане мае прамавугольную форму. Капліца знаходзіцца ў занядбаным стане. Дах абваліўся.

     Брама перад капліцай складаецца з чатырох чацверыковых слупоў, якія выкананы ў той жа тэхніцы, што і капліца. Вароты ў апошнія гады адрамантаваны.