Парэчча. Парк Скірмунтаў

У мястэчку Парэчча Пінскага раёна ёсць вельмі шмат цікавых гістарычных мясцінаў і каб іх усе пабачыць сюды трэба прыехаць на цэлы дзень. Калісці гэта была невялікая вёска мала каму вядомая, але напрыканцы 18 стагоддзя мястэчка было набыта Скірмунтамі ў Агінскага.

 Скірмунты пераўтварылі Парэчча ў адзін з буйнейшых прамысловых цэнтраў на Беларусі. Тут пабудавалі сучасны цукровы завод, бровар, сыраварню, суконную фабрыку і многае іншае. Таксама тут быў створаны прыгожы парк, які дагэтуль уражвае сваёй прыгажосцю і непаўторнасцю.

 На беразе ракі Ясельда ў пачатку 20 стагоддзя Раман Скірмунт залажыў парк, які стаў гонарам ня толькі роду Скірмунтаў, але і ўсяго Пінскага краю.  Р. Скірмунт (1868 - 1939) – вядомы беларускі, польскі і расійскі палітычны і грамадскі дзеяч, які пакінуў пасля сябе багатую спадчыну і ў тым ліку гэты незвычайны парк у Парэччы. Аснову парка складаюць велічныя дубы, якім зараз 120 – 180 год. Парк мае статус помніка прыроды рэспубліканскага значэння і мае плошчу больш за 60 гектараў. Раман Скірмунт сам займаўся пабудовай парка і клапаціўся аб фарміраванні калекцыі раслін і ў тым ліку экзотаў. Галоўным упрыгожваннем парка была алея цюльпаннага дрэва, ад якой захаваўся да нашага часу толькі адзін экземпляр. І яшчэ адно такое дрэва ёсць на Беларусі ў Мінску ў Цэнтральным батанічным саду. У парку захавалася 30 відаў рэдкіх раслін, якія сюды прывезлі з іншых краін. Гэта балотны кіпарыс, красналістны дуб і іншыя расліны.

 На ўскраіне парка ёсць гаспадарчыя будынкі цукровага завода, нямецкі дот часоў Першай сусветнай вайны і магіла самога Рамана Скірмунта. Парк у Парэччы мае статус помніка прыроды рэспубліканскага значэння.