Моладава. Капліца – пахавальня Скірмунтаў

У мястэчку Моладава ў 18 – 20 стагоддзях існавала сядзіба, якая належыла вядомаму беларускаму шляхецкаму роду Скірмунтаў. Прадстаўнікі гэтага роду займалі адказныя пасады і валодалі на Беларусі вялікімі зямельнымі ўладаннямі, заводамі і фабрыкамі.

У Моладава была галоўная рэзідэнцыя Скірмунтаў – іх радавы маёнтак. Палац быў узведзены напрыканцы 18 стагоддзя ў стылі ампір Сымонам Скірмунтам, а архітэктарам быў фон Гроса. Палац і сядзіба ў Моладава не захаваліся да нашага часу.

Пры сядзібе была пабудавана капліца, у якой хавалі ўсіх прадстаўнікоў Скірмунтаў. Пахавальная капліца ўзведзена ў 1908 годзе па ініцыятыве тагдашняга гаспадара маёнтка Генрыка Скірмунта (1868 - 1939), які быў кампазітарам і паэтам, аўтарам оперы «Пан Валадыеўскі» паводле рамана Генрыха Сянкевіча. Праект капліцы распрацаваў выбітны архітэктар Тадэвуш Раствароўскі (1860 – 1928) – мастак, дызайнер, адзін з самых вядомых у тыя часы архітэктараў на тэрыторыі Беларусі і Літвы. У Моладаве ў капліцы і каля яе хавалі ўсіх прадстаўнікоў роду Скірмунтаў. Усяго было каля 40 пахаванняў.

 У савецкія часы капліца была разрабавана. Таксама былі знішчаны амаль усе магілы з надгробкамі і каля капліцы. Да капліцы быў прыбудаваны цялятнік, а ў самой капліцы быў склад трактарных запчастак. Зараз капліца на стадыі рэстаўрацыі.

Будынак мураваны. У плане храм – ратонда дыяметрам 8 метраў. Мае сферычны купал. Уваходны партал чатырохкалонны, а астатнія з 2 калонамі. Аб'ём капліцы апрацаваны гарызантальным рустам і будынак завершаны шырокім фрызам з поясам ляпных гірлянд. У вокнах былі каляровыя вітражы. У алтары была усталявана скульптура Хрыста з белага мармуру. Інтэр'ер не захаваўся.